RSS

فليقل خيراً أو ليصمت


update
اعجبتني اضافة الأخ / فارس هوى الكويت
وحبيت انكم تشاركوني الافادة
عن أبي هريرة أن رسول الله صلى الله عليه وسلم قال
أتدرون ما الغيبة قالوا الله ورسوله أعلم قال ذكرك أخاك بما يكره قيل فرأيت إن كان في أخي ما أقول قال إن كان فيه ما تقول فقد اغتبته وإن لم يكن فيه فقد بهته
رواه مسلم

قال تعالى
يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا وَلَا يَغْتَب بَّعْضُكُم بَعْضًا أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌِ
الحجرات آية 12


ويزاه الله خير على اضافته

****






عبارة أحببتها فنقلتها لكم

.

.

لا تغتب أبداً

فمن نحن لننصب أنفسنا قضاة على العالمين
فنحاسبهم على خيراتهم و مساوئهم
احكم على الناس لذواتهم كبشر
و اترك الصراعات الفكرية جانباً ليكون حكمك عادلاً

أبلة ريلاكس ;p








وحده من رفيجاتي طلبت مني اساعدها بصف من الصفوف
اللي اتدرسهم في واحد من الاندية الصيفية
قلت اجرب حظي بالتدريس
^_^
توكلت على الله ورحت وياها
بيني وبينكم من زماااااان في خاطري أشوف
شكثر أقدر اتحمل ( دعالة ... ازعاج ... شطانة ) اليهال فصارت زلقة بطيحة ;p

دشينا الصف اللي بيكون فيه التجمع
المادة تقريبا عبارة عن ورش عمل
تعلم البنيات يسوون أشيا يدوية بروحهم
والاشيا قريبه إلى التجارب أو الشغلات العلمية
بالنسبة للبنيات أعمارهم تقريبا 3 ابتدائي أو 4


فيه بنتين اسمالله عليهم يشوقون ولابسين مثل بعض أول شي عبالي توينز عقب اطلعو بنات عم




البنات (كانو) قممممة الهدووووء
وهم بوقت شغلهم نقدر انقول هم هادين نوعاً ما
بس ماشالله مع الشطه صار شوية لوية
عمومـــاً فيه مجال نسيطر على الوضع


نيي للمواقف الطريفة

أول موقف عقب ماخلصنا .. اهيا كانت تجربه التلفون اللي بالقلاصات الفلين
يت وحده مستاااااااااااانسة جان تقولي : أبله .. يصير نسوي التجربة بالبيت؟
ابله ريلاكس : إيه حبيبتي أكيد يصير
البنيه : أبله يصير نسويه بالزجاج
أبله ريلاكس : طالعتها يعني من صجها ؟ عقب ابتسمت بويهها
وسألتها شلون ندخل الحبل او الخيط بالزجاج ؟ والا ناوية تكسرين قلاصات بيتكم
البنية : ماتت من الضحك وحست ان سؤالها عبيط .. أو يمكن استوعبت ان مايصير .. المهم افهمت ان لاء
موناقصين حوادث مؤسفة

:p


اسمع نجرة يمي التفت قلت لهم شفيكم
الا وحده اتنهوص .. ابله شوفيها اتدوس على تيلفوني
آنه : وخري ياحبيبتي عن تليفونها خلو بينكم مسافه

أبله أبي تقصين لي خيط طويل عشان اقعد بداري واكلم امي بدارها
أبله ريلاكس : نو كومنت

أبلة سويلي على قلب الحب .. ابله أبي على قلب الحب أبي على قلب الحب
أبله ريلاكس : إن شااااااااااااالله حبيبتي نطري شوي



وآنه قاعده ازيّن اكوابة البنات شفت بنية جنها (تاز) تبااااارك الرحمن

تلوووي وتحوووس مااسمع الا اليهال يتشكون منها
قمت اقعدها بعيد عنهم او اشغلها بأشياء تسويها أو أشيا تساعدني فيها المهم ماتداحر اليهالوه



أما اللي يلبسون مثل بعض فوحده منهم ماشالله عليها تعرف رد كل كلمة بدون مبالغة
اعطيكم على سبيل المثال
أبله ريلاكس : فلانه حلوه بلايزكم من وين ؟
جان تبتسم ابويهي وتقولي : اعيونج اللي حلوه ابله
آنه صراحة ضحكت ابويهها : يابعد قلبي والله تسلمين
حسيت انها اسمالله عليها مره بس صغيره


وآنه مندمجة واساعدهم بشغلهم جان تتهاوش (تااااز) قصدي
البنيه الشيطانة مع وحده وتعيب عليها قلت حق (المغلوب على امرها) إنها تصير على يميني
والشيطانه على يساري وخليتهم يقعدون بكراسيهم
شوي الا( المره الصغيرة) تعلم المسكينه : قوليلها الله يسامحج
المسكينة : ( تاز ) الله يسامحج

وكل شي - كان - تمام

لو ما ماشالله ماشالله هالبنيه هم تناجرت مع وحده
واقعدو كل وحده تحلف ان الثانيه اللي بدت وتقول
عن الثانية جذابة والا لاتجذبين
اهنيه احس اني ودي اكمش شعري
جان اقولهم : خلااااااص باجر الله يوم القيامه يحاسبنا كلنا
ونعرف منو الصاج ومنو الجذاب
توني مخلصه من الجملة الا وحده دشت عرض

(( اشهقت قبل ))
جان تقول : أبله ؟ يوم القيامة باجر؟ أبله يعني شلون ؟
آنه صراحة نسيت اني كنت طفرانه وفصلت عليها مقروده من الضحك
قلت لها : باجر يعني بعدين مو باجر باجر !!!؟
البنية (المخترعة) : إيه أبله عبالي باجر

.

.


انتهت نوادري مع اليهال ... واللي استفدته --> نحتاج ننزل الناس منازلهم
واليهال يبيلهم صبر وقلب كبير ولازم نفكر بنفس تفكيرهم ونحط نفسنا مكانهم
عشان انعرف سبب هاللي يسووونه لأنهم يظلون يهال
واكيد كنا بيوم من الايام مثل وحده منهم
والا شرايكم ؟
^_^



الشــــمعة





((الشمعة))
ذلك المثال الذي يضرب للتضحية


هناك من يرى أن الشخص صاحب الكرم الطائي في العطاء
كالشمعة
فهي كمـا علمنـا مثـالاً للتضحيـة والبذل
وللأم والمدرسة النصيب الأكبر من هذا التشبيه
وكل شخص يبذل ويعطي بلا حدود


ولكن ما شغلني كثيراً هو
منظر الشــــــمعة


1
تحترق
فتؤذي نفسها بتلبية حاجات الآخرين اللامنتهية
وكل ذلك في سبيل اسعادهم

2
تذوب
من الألم والمعاناة والتعب
بل لا تكاد تلتف إلى مدى حاجتها للراحه
كل ذلك في سبيل ارضاءهم

3
تنتهي
فيبحث الناس عن شمعة أخرى !؟
أو أي طريقة أخرى لجلب النور
والإضاءة التي يحتاجون إليها


.

.

.


وثم ما هي أطول فترة ممكنة حتى ينتهي بها المطاف إلى أن تنطفء ويختفي نورها ؟

مردها بتمل وتطفي أو انها تكمل مشوار الاحتراق ويستغلونها إلى آخر رمق .. عفواً إلى آخر الفتلة ويشوفون شمعة تحترق مثلها أو أزيد





رأيكم بالشمعة ؟
وما هي البدائل من وجهة نظركم ؟