أنــت

من قال إن الظفر مايطلع من اللحم ؟

ممكن جداً يطلع العظم من اللحم !
.
.
.

آنا أقولكم متى

لما يطيح شي ثقيل على ريولكم وتحسون انها تندح عليكم وودكم تبجون من الألم اللي حسيتو فيه
بعدها بفتره سبحانك ياربي يوقف نمو الظفر اللي طاح عليه هالثقل .. مسبباً لوناً بنفسجياً على وردياً وربما مزورقاً
ويبدي يطلع ظفر يديد تحت هالظفر اللي تنح ومو راضي يطول
بعد فتره بيطول الظفر اليديد والظفر المطقوق صامد مع تنحيه قليلاً عن مكانه القديم
( يعني نقدر نقول إنهم راح يكونون عباره عن طابقين من الأظافر )
وأيضاً بعد فترة راح تلاحظون ان الظفر اليديد يبدي يدز الظفر القديم
بعدها راح تلوع جبد الظفر القديم من كثر مايترفس فيه الظفر اليديد وبينشلع بروحه

الحمدلله على سلامتي :p

وجت سليمة الحامدولله



فالمثل مافيه أي دليل على صحته ! ويحتاج لتعديل أو حذف
:p

بما إن الحديث يدور حول الأظافر حبيت أضيف تجربتي مع منتج الـ almond oil
من Body Shop




طبعاً هذي الصورة اللي لقيتها له ..
اهوا عباره عن ريشه ونصبغ فيها الظفر --> الشرح متعوب عليه


اللي لاحظته إن خله أظافري أقوى من قبل .. بس طبعاً لازم استمر عليه
لأني الحين موقفته وصايره تنكسر بكل طلعه !؟


مشكلته إن ( ريحته حزوره )
فالحــــــــــل : إن تتحملونه 10 دقايق يومياً تالي تغسلونه والا تمشونه عادي .. المهم إن ينحط كل يوم


بالنسبة للوضوء : ماراح يكون مثل الصبغ لأن بمجرد مسحه راح يروح فمامنه خوف بس المهم ينمسح :))

المجموعة الثانية ..

1
اغلبنا قرى ذي سيكرت .. وبالنسبة لي كنت شايفه إن فيه شي ناقص
يعني مولاقيه السيكرت اللي يقولون عنه ؟ أغلبه قصص !؟ زين وعقب هالقصص وين السيكرت ؟

وعقبه طلعو جم كتاب هم مااعجبوني .. وماحبيت لا الاسلوب وهم مالقيت اللي أبيه فوصلت لي النص وخليتهم يولون


يوم تصفحت هالكتاب تفاءلت ان يكون احسن منهم :))
بيكون ان شالله كتابي القادم وأكتب نبذه عنه .. وأهم النقاط اللي اعجبتني فيه

2
لأني هاليومين أحس إني اكتسب صفة الصبر !؟
صبوره صح ! بس مو بكل المواقف !
فودي أكتسب هالصفه .. ( إنما العلم بالتعلم :) )

3
عجبني بهالكتاب التنوع بجذور الكتاب يعني مو بس اللغة العربية :)

أما المجموعة القصصية فهي :


1
مجموعة قصصية للأخ أحمد الحيدر
الطبعة الثانية من النساء من الوفرة والرجال من الاحمدي تخرع مع هذا اللي مبحلق عيونه ! ؟
حياتنا عجيب وغريب صراحه ;p
أما خنفروش فليلحين ماتصفحته

2
حبي .. حبري .. وكلماتي .. مجموعة قصصية لـ حمد الزمامي

3
مجموعة لـ هيثم بودي .. الفنار .. الصالحية .. الدروازة
هذا اللي قدرت أحصله صراحة الباجي مخلصين :/

أعرفكم على عيالي ;p

هذي طبعاً بعض اللقطات للمجموعة اللي أخذتها من المعرض ( عيـالي اللي راح ينضمون حق اخوانهم بالمكتبة ) و أحس إني ماحجلت المعرض لأني ناوية آخذ لي جم رواية حق الشاليه والسفرات وإذا الله رزقنا امطيره حليوه جذي واجابلها واتقرا لي جم كلمة :))

** مجال التطوير وتنمية الذات أخذت :

1
كتب لويز هاي louis hay
لقيتهم عند دار الفارووق - مصر

وفيه بعد عند علاء الدين -سوريا
مترجمين وخالصين .. بس دار الفارووق وايد حبيت طبعتهم وترجمتهم
أما شغل سوريا استغفرالله ! لو ما إني ناطرتهم جان مااخذتهم أصلاً

كتب سوريا ماصورتهم .. واحد منهم عن الاستشفاء الذاتي
راح اخصص له بوست كامل عقب مااخلص من الكتاب ان شالله

2
الاستراتيجيات الذكية للتأقلم مع التغييرات الحياتية
وايد حبيت اسمه .. والطباعة جيدة والاسلوب واضح وفيه خطط اعجبتني داخله

** مجال العلوم الإنسانية ( إن صحت التسمية ) أخذت :

الفراسة
أدري الموضوع وايد منتشر .. وبالنسبة لي عندي أكثر من كتاب عن الفراسة .. بس مادري ليش اخذته ;p
يمكن الأسلوب أحلى من أسلوب الباجي .. وفيه بعض التطبيقات العملية !

** مجال الأدب أخذت :

( الفترة اللي طافت حسيت إن الأسلوب الأدبي عندي يبيله تطوير وخصوصاً إني ما أستخدمته من أيام الثنوية ! فتقريباً انمحى .. قلت اقرا بهالمجال وأستفيد وأبدي تطبيق .. عاد شجعوني إذا كتبت شي بأسلوب أدبي ;p )




1
تاريخ اداب العرب للرافعي
( أحط النبذة باجر فيني النوم )







2
تاريخ الأدب العربي للزيات






3
جواهر الأدب للهاشمي
( انصحتني فيه وحده يزاها الله خير )







4
شرح المعلقات العشر للشنقيطي
من زمااااان كان ودي أقرا عن المعلقات العشر
حبيت طريقة المؤلف .. حاط نبذة عن كل شاعر ومقسم الأبيات والشرح عليها







ماخلصت .. واتمنى صج صج أتمنى إن يمديني أروح قبل لا يخلص المعرض :/

أمة اقرأ تقرأ إ...

أمة اقرأ !
فعلاً أمة اقرأ تقرأ .. إذا اهي تبي راح تقرا :)

بكل بساطة
1
موضوع يهمنا
2
اختيار الكتاب المناسب
3
همة ومواصلة القراءة



فيه أسهل من كده ؟




50 كتاب !
دراسة قريتها ماأذكر وين :)
لو قرأ الانسان (( نصف ساعة يومياً )) كتاب من الحجم المتوسط راح ينهي50 كتاب في السنة !

.
.
.
شي جميل صراحة .. يعني خلال ثلاث سنين او أربع ماراح احتاج أقرا شي لأني بجذي أكون قارية المكتبة :p




فرصة !
معرض الكتاب الدولي بلش اليوم .. فاللي حاب إن يختار له مجموعة الكتب اللي بيخلصها هالسنة لايطوف هالفرصة



شورو علي ..
أبي اقتراحاتكم ومشاركتكم لي بمجموعتي لسنة 2010
شرايكم شاخذ .. بنوع هالمره وماني مقتصره على الكتب اللي دايماً اقراها :))
فـ شورو علي لو سمحتو وقولولي شاخذ :)

ياحلو السنع والعدال

قبل جم يوم كنت بالجمعية ومادري ليش كان متقلص عدد كاشيرات الجمعية الله يهديهم وحبكت الناس كلها تشتري ماجلتها وقت اللي آنا داشه آخذ لي بندول وإينو ;p

المهم نطرت حالي حال خلق الله إلا هاللي ماشالله عقب ماحط اغراضه عشان يحاسبهم جان يحط السلال اللي تحت الماكينة بالعربانه ويوخرها ... ويدني اغراضه عشان يخلي مكان حق اللي وراه ! --> كلش مو منبطه جبدها من اللي يخلون عرباناتهم ويمشون ;p


اهوا تصرفه تلقائي بس آنا أول شي طرى على بالي يوم شفت المنظر السنع حديث الرسول صلى الله عليه وسلم ( أحب الناس إلى الله أنفعهم للناس )

سبحانك ياربي يعني اهو متعود على هالطبع (السنع) وهالطبع امدحه الرسول صلى الله عليه وسلم لا ومو أي مدح .. فيه محبة من الله لهالشخص ! وربي لي حب أحد يسخر له الدنيا كلها .. صراحة الله يهنيه على هالسنع اللي فيه وياليت كل اللي بالجمعية مثله



وهذا نص الحديث للي حاب ان يستفيد :

أن رجلا جاء إلى النبي صلى الله عليه وسلم فقال يا رسول الله : أي الناس أحب إلى الله ؟ وأي الأعمال أحب إلى الله ؟ فقال رسول الله صلى الله عليه وسلم : أحب الناس إلى الله تعالى أنفعهم للناس وأحب الأعمال إلى الله عز وجل سرور يدخله على مسلم أو يكشف عنه كربة أو يقضي عنه دينا أو يطرد عنه جوعا ولأن أمشي مع أخ في حاجة أحب إلي من أن أعتكف في هذا المسجد ( يعني مسجد المدينة ) شهرا ومن كف غضبه ستر الله عورته ومن كظم غيظه ولو شاء أن يمضيه أمضاه ملأ الله قلبه رجاء يوم القيامة ومن مشى مع أخيه في حاجة حتى تتهيأ له أثبت الله قدمه يوم تزول الأقدام .

[ السلسلة الصحيحة ]

.
.
.

فياجماعة الخير اللي كنت بوصل له إن حتى السنع عليه اجر =)

إليكم ما في جعبتي لهذا الاسبوع

يقال النّوم ثلاث لامات: ( طبعاً الغفوة مو النومه الطويلة )

1. حيلولة: وهو النّوم بعد الفجر، يحول بين المرء وعمله، وفيه حديث: «اللَّهُمَّ، بَارِكْ لأمَّتِي فِي بُكُورِهَا». وهو حديث صحيح.
--> فعلاً يحول بين المرء وعمله / رزقه .


2. قيلولة: وهو النّوم بعد الظُّهر، وهو مفيد، وفي الحديث: «قِيلُوا؛ فَإِنَّ الشَّيَاطِينَ لا تَقِيلُ». حديث حسن.
--> واحنا نقول يقيّل .. فحلاتها القيلوله نص ساعه بالكثير ساعه إذا صج يعني بيريحون ؟


3. عيلولة: وهو النّوم بعد العصر، وفيه حديث: «مَنْ نَامَ بَعْدَ العَصْرِ فَاخْتُلِسَ عَقْلُهُ؛ فَلا يَلُومَنَّ إِلاّ نَفْسَهُ». وهو حديث ضعيف.
--> على الرغم من ضعف الحديث إلا أن المعنى معمول به ، فعلاً عله ..! ونحس روحنا ثقاااال !

ياجماعة آنا مسوية عرض لي نهاية الشهر مجاناً جان تبون اقرا لكم الكف والا الفنيال بس سوو لي سكان حق إيدكم والا فنيالكم قلبوه جذي بالسكنر خنشوف لكم حظكم :p

http://relaxyo.blogspot.com/2009/10/abracadabra.html

فيه حديث حلو وصراحة أول مره يمر علي وحبيته
عن عبدالله بن عمرو عن النبي : { ما من أحد من الناس يصاب بالبلاء في جسده إلا أمر الله عز وجل الملائكة الذين يحفظونه، فقال: اكتبوا لعبدي كل يوم وليلة ما كان يعمل من خير ما كان في وثاقي } مسند الامام احمد
سبحانك ربي ما أكرمك !