مقتطفات من سفرتنا

1

الافتتاحية

لعبة لعبت الحيلة .. يااااااااني مااحب هالحركه
لما الانسان يحاول ان ايوخر عن الناس ويروح يمين الا اهما رايحين يمين يروح يسار الا اهما رايحين يسار شيسوي بعمره ؟
.
.
.
بالنسبة لي وقفت انطر اللي جدامي يحدد مصيره


2

مقققققلب

مادري ليش نسمع كلام الناس لي سوو روحهم ينصحونّا
رحنا سوق مرشد ؟ صراحه يوم نزلت اخنقتني العبرة .. مع هذا كملت خطاي بكل ثقه مابين الجاليات المتنوعه

أحلى شي سويته إني حاولت أأدب الناس اللي جدامي وأقولهم إذا تبون تمرون قولو شويه وآنه أوخر .. طفارتي آدمي يمشي وبيني وبينه شبر !!!

الحمدلله ياربي ان ماطولنا والا جان صج قعدت بنص سوقهم وبجيت .. صراحه ! حسافة العنوة .. والله يسامح اللي امدحو لنا اياه .. الظاهر يبون يسوون فينا دقه او ان الوضع عندهم عادي هناك بالجو العليل والمكان الجميل!


3

على قولت بعض ناس : إنتي لو تشوفين نملة منكسره ريولها تكسر خاطرج

دشت ريلاكس تشطب على المحلات آخر يوم واعجبتني بدياتهم واخطط مع شنو البسهم .. رحت احاسب .. اتطقطق المره تبي تدخل السعر موراضي ؟! تحاول مره ثانيه !!!!! أبد موراضيه ونسكافيه تقنع فيني إن خلاص مو لازم .. أبد السالفة صارت سالفة عناد وأبي البديات شسوي؟ المهم دقت على رفيجتها والحمدلله حاسبتها وعقب ماخلصت تشكي لي الحال ياقليبي واقعد اسمعها .. وتقولي إنها توها توظفت بقالها خمسطعشر يوم .. الخ والمختصر المفيد إن القروب اللي معاها مو خوش ناس .. فشسويت ؟ لازم اقدم لها مشورتي :)))

قلت لها غيري شغلج شمقعدج وياهم ؟

قالت لي هيّا الشركه كويسه بس اللي معايا .... --> ترى ماسبّت مسكينه بس عفست ويهها


4

الكويتي أنفع :)

دشيت محل ملافع وواثقه حضرتي ماجيكت البوك قبل لا أدش المحل .. المهم عجبني ملفع تحاسبت مع الاخ .. مسويه روحي اكاسر قلت له شوف ماعندي ترى الباجي الا كويتي أعطيك كويتي؟ ( صج عاد ما معاي الا كويتي مادري وين راحت الفلوس وشلون طارت .. بعدين هالمحل ماعنده كي نت شسوي بعمري ).. قال : جيب كويتي
عطيته نص لأن اللي باقيلي 5 دراهم .. شاف النص مااعجبه ...!؟؟؟ سنو هدا ؟
قلت له روح الصرّاف يعطيك مكانه 5 درهم لا وبعد اكثر
فيعني تخيلو الفلوس بيده اماراتي والخمسة درهم نص دينار :p

خذيت ملفعي وطلعت ^_^ وادعي ربي يعطيه اكثر من الـ5 دراهم لا يدعي علي

5

يقولون بالسفر تعرف طبع الشخص اكثر أو بالأحرى ماتعرف طبع الشخص الا بالسفر

صح اللي سافرو معاي أسرتي حبيبتي .. بس اكتشفت اطباع يمكن كنت غافله عنها!؟
أو ماحسيت فيها عدل إلا بالسفر .. أو يمكن ماشفتها بوضوح إلا بالسفر

عموماً أخواني بدون تفصيل اكتشفت فيهم الصفات الزينه والشينه

بدون دخول بالتفاصيل :

عجبني .. على فكرة ..... = الذكر / الانثى

عجبني .. صبــر ((...)) وطولة البال اللي عنده

عجبني .. تواضع ((...)) و تكيّفه مع الوضع اياً كان

اعجبتني .. يمعتنا اللي صج نحتاج لها في زمن
صار معنى الاجتماع فيه = القعده بالصاله
وكل من لاهي يا بتفكيره يا بشغله

عجبني.. تحمّل ((...)) لمسؤولية لو كنا بالكويت ماتحملها

عجبني ..التعاون الواضح بالسفره ولله الحمد ^_^


ماراح اذكر اللي ضايقني لأن يعتبر 2,5 من 10 :) فتترجح نسبة مااعجبني
عؤبال باجي الســـــــــفرات

أحبكم وعسى الله لايحرمني منكم


6

وخير جليس

صديقي الصدوق في السفرة كان :
عقل مثل الماء
الاحتفاظ بتوازنك في عالم مشوش

تناصفت تقريبا .. بس الحين لهيت وناويه اخلصه قبل رمضان عشان اتفرغ حق الختمه


تعليقي على اللي قريته ..

لحد الحين اللي استفدته :
1. ما اشغل نفسي بالتفكير بشي مستقبلي ماصار ليلحين
ولا في شي صار وخلص ومن الماضي .. خصوصاً المواقف اللي موحلوه :)

2. تمرين تعويد العقل الباطن على الاستيقاظ بدون ساعه
لووول مره تضبط ومره لأ .. وفي الكتاب يقول مشكلتنا في بالنا دايماً ان احنا موقاعدين ناخذ الوقت الكافي وفعلاً كل ماقعدت قلت حرام توني نايمه والا اقعد احسب جم ساعه جنه فرض علي انام 8 ساعات ومافوق ;p

3. تخمين : صاحب الكتاب متين
لأن وايد امثله ضربها عن الوزن وان المهم الجوهر و و و ^_^


واذا خلصت منه قلت لكم شستفدت

7

صيد الكاميرا

ترى موبايلي ليلحين ماحاشتني تكنلوجية نسكافيه ودانه يالله من فضلك ..!؟



دخلنا المجمع حزة صلاة .. فرحنا نصلي عشان نتسوق على راحتنا
.
.




تمنيت على كبر هالمجمعات اللي عندنا يكون للمصلى نصيب حلو مقارنة مع حجم المجمع .. حدددي كيّفت ماشالله شرح



اهنيه صعدنا فوق انتغدا .. والا مجابلني
.
.




سلم والله اللي مجابل المنيو



وختي وسينه والله العنونو

اهنيه الاخت دانه مرتبه التجوري
.
.



جنطة الجوازات - بيت هامتارو - كاكاو - عايلة هامتارو




لقطة جماعية .. اثنين شاريتهم من الكويت ومسفرتهم معاها والباجي مالقتهم الا في توي ار اس
= 2 كويتين
2 اماراتيين

لمّت الشمل الاخت .. واجمعت بينهم بالحلال .. هاذي دانه صل على النبي




مثل ماقالو ناس الله يذكرهم بالخير :
الواحد مايعيش الا مره وحده .. ليش نحرم روحنا




والله كنت معطيه نفسي ايحاءات قبل السفر ان ماكو تخريب
إلا في الحالات الاضطراريه .. وماشالله اغلب الوقت كان اضطراري
ومحد زادني هالكيلوين إلا هالوجبة .. لا وبعد ياينا رمضان ياحلو لو



ps

UTMoST
عدلت البوست للتوضيح :)
وين ياخلاف ملفع بخمسة درهم

HosNo
وكبرنا الخط