أمور لابد من معرفتها

1

حدد المشكلة التي تعاني منها بالضبــــــط

(( لو كانت المشكله كبيرة ومتشعبة لابد من تجزءتها ))

**أول موقف
_______

[ مثال : الوضع بالبيت مكهرب طلعت وطقيت الرصيف وكملت الا الشارع مزحوم وماكنت مركزه وقت السياقة وماقصر الاخ الفاضل اللي يمي بالهرنات ومادري شلون وصلت الدوام الا بويه المدير وحضرته معصب على الموظفين ومن حظي السعيد طلع باجي حرته فيني ومادري شلون مر اليوم أدش الا هاللي مجبله ( ميري صاحبة الصوت الحاد ) وتسمّع لي لستة الاغراض اللي ناقصة وآنا مو بالعة نفسي وزفيتها وقلت لها بعدين وختمت يومي ببجية ]

--> طبعاً القصة من بنات أفكاري .. ومثال ليس إلا
صعب يعني كل هالاشيا تصير حق الانسان
بس أبي اوضح السبب الاساسي بكل هاللوية !

.
.
.

في حالة تطبيق الـ eft

نجزء المشكلة :

الوضع المكهرب شمنه ومن منو ؟

طقة الرصيف والربكة اللي سببتها لي ؟

والأخ اللطيف الظريف والمسيرة اللي سواها ؟

المدير الغثيث ونفسيته الخايسة والويه المعفوس والزفه اللي كليتها ؟

ميري وصوتها الحاد والاغراض اللي ناقصة واختيارها الوقت المناسب ؟

وليش بجيت ؟ طبعاً راح أبجي لأني آدمية وخلاص مابقى موقف ماصخ ماصار لي فشي طبيعي إني أبجي


عموماً كل اللي صار أقدر أطلع منه مشكلة او مشكلتين اهما اللي صج ضايقوني واعفسو مودي وخلوني اندق آخر اليوم وابط بجيتي

أمبيه صدقت اللي صار !!! :p

اسمالله علي وعليكم بس آنا متعمده أيمع أكثر من موقف بيوم واحد مع اختلاف المواقف طبعاً

و مرات يكون موقف سخيف

** الموقف الثاني
___________

[ مثال : وآنا أسوق مركبة معاي وحدة ماتنزل لي من زور بس لظرف ما كانت معاي .. وحضرتها المفروض تدليني المكان اللي تبيه واهيا تسولف بموبايلها ، وقبل لا نوصل وآنا أقولها فرعي والا سيده .. فلانه فرعي والا سيده وألف عليها أنطرها تتحجى ( طناااش ) ؟!! لما ييت بكمل سيده جان تقول لي : يافلانه يمين وترد تكمل سوالفها !!!! ]

--> بيني وبينكم الموقف هذا صار لي فعلاً وحسيت إني سايق ابوها
واطلعت لي توك ببل يافلانه فارجي واللي يعافيج وكنت قاعدة احذفها من الدريشه !!!
.
.
فردت فعلي إني ضحكت والكشره شاقة الحلج وأقولها إن شالله

فمااحتجت وايد الـ eft
بهالموقف .. وخصوصاً إني قاعده أسوق يعني أبداً ماينفع أطبقه وآنا بالشارع
وبعدين الموقف كان باط جبدي بوقتها بس مو كل ماذكرته تنبط جبدي

ومرات يكون موقف سخيف بس كل ماذكرناه كدرنا
هاذا المطلوب معاه إنا نطبق معاه الـ eft

** الموقف الثالث

_________

[ مثاله : موقف صار بفترة الطفولة أو المراهقة والحين احنا كبار بس لما نذكره تضيق خلوقنا .. للأسف ذاكرتي ماتسعفني وبنات أفكاري راحت وخلتني ]

2

أعطي لهذه المشكلة درجة من 10

[ اخفيف المنقل المدير المحترم ! وتسفله من صباح الله خير ]

وسنتدرج إلى أن نوصل النسبة إلى صفر بإذن الواحد الأحد :)

ومعنى الصفر أي أننا تحررنا من المشاعر السلبية في الموقف السابق
يعني خلاص باح !!!



طبعاً شي حلو ودي أقولكم اياه : التقنية راح تنفعنا ان هالمشاكل يا تختفتي او تقل بس ماراح ترجع في يوم من الايام
ولو طبقنا التقنية كل يوم لمدة سنة = 365 مشكلة كانت متعبة نفسيتنا وعقولنا مسحناها نهااائياً

بحيل اللي عينه ماتنام ^_^

الموضوع طويل وأدري إن بالكم أطول .. واماكن الربت تحتاج شرح .. والتطبيق العملي يحتاج شرح أيضاً
فراح أكتفي بهذا اليوم لأني جد تعبانه وراسي قام يدور وودي أقول عيوني مخيطه بس آنا ناطرة الأخت النومة تشرف
تصبحون على خير مره وحده