تقبل الله طاعتكم .. وعيدكم مبارك

عيدكم مبـارك وتقبل الله طاعتكم ^_^

.

.



*****

1

اعجبني

حرص الناس على الصلاة بالمصليات
وحرصهم على صلاة العيــــــــد
مع العلم إن وقتها مثل ما قال
الشيخ عدنان : في غير اوقات الصلاة
--> الشي الوحيداللي سمعته من الخطبة ;p
لأن كان زحمة شـــوي ويالله حصلنا لنا مكان



2

افرحني

عدم اندثار / انقراض الزي التقليدي
الحمــــدلله ياربي الكــويت ليلحين بخير
=)



3

اضحكني

ابتسامة ياهل كتكوت فازع من صباح الله خير
عشان يشوووف العيد على قولته ;)

ويحن ويطحس .. يمه وين العيد ؟ ناوي يقابله شخصياً

وحرص أهله إن اييبونه معاهم ويعلمونه واهوا صغنونو
شكله بعمر الروضه اذا مو أصغر .. بس يالله من فضلك الدشاشه
والمكسر اللي منزله تحت كرشته جنه صج

عسى الله يبلغنا فيه معرس

^_^



4

اسعدني

دعوة سمعتها من وحده من العيايز
حسيتها طالعه من شغاف قلبها
أحبهم وأحبهم شوفتهم
عسى الله لايخلينا منهم
ولا من دعواتهم الحلوه
ويحفظهم حق اهاليهم
ويحفظ اهاليهم لهم



5

أبكاني

ياهل كان ضايع ويدور أمّه
ماني شارهه على الأم
يمكن اهيا بعد تدور عليه
بس عور قلبي وقعدت أتعبّر بالطريج
وأدعي ان يلقى امه
ولما وصلنا السياره طخيت



6

أشجاني وزادني عزاً وفخراً

أشجاني : الطالبات المغتربات
لأني شفت طالبات كانو معاي بالجامعة
وتقطع قلبي عليهم اهما وخواتنا واخواننا
المغتربين بره كويتنا
.

شيحسون فيه الحين ؟ بدون اهاليهم ؟
وبيعايدون منو ؟ وشلون يحسون بطعم العيد ؟

.
.

وبنفس الوقت زادني عزاً وفخراً
ان اللي جمعنا بهالمكان الاسلاااااااااام
فلا فرق بين عربي ولا أعجمي إلا بالتقوى
عسى الله يثبتهم ويعينهم على هالغربة
ويردهم حق اهاليهم ســــالمين
ورافعين روســـهم وروسنا بشهاداتهم



7

أمنيتـي

توسعة للمصليات
وخصوصاً المناطق اللي فيها حدايق وسيعة او حتى ملاعب !؟
كلّه يوم واحـد او بالاحرى نص ساعة من 24 ساعة



8

اعتـراااافي

يمكن مو كل عيد اروح فيه الصلاة
بس توني استوعب سبب النفس الحلوة
بأول يوم عــيــد بالنسبة لي
وتوني ألاحظ إني اكون أكثر راحة واطمئنان
حتى الوقت مبروك لا إله إلا الله
مقارنة مع الأيام اللي اخمد فيها
واقول حق دانه طلعي وصكي الباب وراج
--> مسكينة لما يطرشونها تقعدني


وبما إن نومتي معفوسه اضطريت إني اقعد
وشربت لي قهوه عشان اصحصح
ونطرت الصلاة لا بعد متكحلة
وكاشخة بجنطة وجوتيها - تكرمون

الفراغة وماتســـوي
.
.
.
فنصيحة لاتخلونها .. نساءاً ورجالاً .. صغاراً وكباراً .. شياباً وعيايزاً
;p


خو كلها ركعتين وخطبتين بو 10 دقايق


*****


طبعاً ماني حارقة على نسكافيه
لأني شفتها تجكجك اليوم بعض طقوس العيد