ساندريلا ..!؟

نعومي تقرّ بضرب خادمتها والعقوبة: جلسات علاج
1300 (GMT+04:00) - 16/02/07

نيويورك، الولايات المتحدة (CNN) --

أقرّت عارضة الأزياء العالمية، ناعومي كامبل، أمام القضاء الثلاثاء، أنها قامت بالفعل بضرب مدبرة منزلها السابقة، مستخدمة هاتفها الجوال، معتبرة أن الموضوع لا يعدو كونه "حادثاً" غير متعمد.

المصدر
http://arabic.cnn.com/2007/entertainment/1/17/campbell.naomi/index.html





سبب اختياري للخبر
لأني سمعته بالتلفزيون
ودورت عنه في قوقلووووه
وهذا اللي حصلته



واللي اقصده سووووء معاملة الخدم
مو بس الشماته بالاخت نعومي
نعامه ترفسها وتفكنا منها



وصار لي جم يوم اسمع حوادث عجيييبه غريبه !!؟
طبعاً ماراح اتكلم عنهم شيسون او شيحسرون مرات بعيال الاوادم
بس الأصل في الانسان ان يكون انسان طبيعي صاحي خالي من الامراض العقليه والنفسيه
اما الاستثناءات فهي لسبب .. يا من معاملة معزبتها او من بيئتها وعاد شوفو شصار فيها ايام الطفوله
او اي مرحله كانت فيها هناك في ديرتهم .. ومو هذا موضوعي


موضوعي عن : معاملة الخدم ..!؟


استغرب من الناس اللي عبالهم ان الخدم من كوكب ثاني !؟ وزفه بالخدامه وزفه بالقاع !؟ والا اتكلمها من طرف خشمها !؟ الا عاد تصارخ عليها !؟ ياااا انسانه فهمي ان حالج من حالها وإنها بشر مو بهيمة !؟

وإذا عاد ماافهمت عليها مقروده شوفو عاد شييها !!!!؟ نفس اللي يحليلها شفتها بالمكتبه تحاجي خدامتها نص عربي ونص انجليزي .. إيه شالله حاااادج

فلانه كم
( come )

يت فلانه

لما أقولج كم .. دونت قو
( don't go )
على كيــــــــفج !؟


لاحظو ان بصراااخ !!!؟

تكفييييييييييين من غاصبج اتحجين انجليزي !؟
تحمدت ربي وحاسبت شغلي ونزلت !؟




وحده يحليلها ماتخلي خدامتها تقعد مع الخدم !!!!!؟ جنها معاقبتها !!!!؟
تقعد على كرسي من الكراسي زين وبعدين وانتي مومحتاجتها !!!!؟
واتضحكني لما تناديها فجأة اتغير نبرة صوتها !؟
ماحبيت اتدخل بطريقة معاملتها
ادري انها زينه بمعاملتها لو ما النزاره !؟





طبعاً هذي مواقف لطيفة خفيفة مقارنة مع خبر اليوم
لأن انصعقت اليوم يوم قريت بالجريدة
وحده الله يهديها قاااااجه الخياطه بمقص !!!؟
لأنها خيطت بدلتها غلط!!!؟
صراحه جزاااااره هذي !؟



وغير نعامتنا .. قصدي نعومي !
ماعليها شرهه خو هذي لادين ولامذهب



اللي اشره عليهم صج المسلمين .. وين أخلاقنا ؟ وين ديننا ؟ ويننا عن سيرة رسولنا اللهم صلي وسلم عليه ؟
ليش انتناسى حسن المعاملة ؟ واشمعنى الناس الغرب نعامل عدل ؟ والخدم اللي معانا بالبيت أولى من الأغراب ؟ وخصوصا ان نحتاج لهم في مساعدتنا بأشيا وايده .. هذا إذا مااعتمدنا عليهم بكل صغيره وكبيرة ؟ صح لهم معاشات ياخذونها مقابل شغلهم .. بس هم لهم قلوب يحسون فيها ولهم مشاعر مثلها .. ويفهمون اذا كنا متضايقين منهم والا لأ !؟



هالناس اغتربوا عشان هالجم بيزه اللي يحصلونها .. !؟ كراااف وفزعه من صباح الله خير ولا فوق هذا يحصلون زف والا بعد بعضهم ماتبرد جبودهم الزفه الحمدلله والشكر يطقون !؟ وين قاعدين !؟ والا ليلحين عبالهم اهما بعصر الانسان الاول !؟



وبعدين صراحه قلت ان بعض الأشيا نحتاجهم ان يساعدونا فيها !!! وإذا نبي شغلنا يطلع على أكمل وجه مثل مايقولون .. لازم نعاملهم معامله زينه !!! يعني مستحيل ازف واشخط فيها واسب اهلها وطوايفها .. وانطرها تسوي لي شغلي مثل اللي ابيه !؟
هذا اذا مااحقدت علي وحطت لي السم الهاري .. ومالاداعي افصل .. سواء سحر او شي خايس .. غير قلبها بيكون شايل علي !!!
وعلى قولت اخوانا المصريين : بات مظلوم ولا تباتشي ظالم




وترى ورانا حساب وعقاب .. وتخيلو عاد تكون كل اعمالنا زينه وكانت كفة الحسنات اثقل لو ما معاملتي الخايسه لهم ..!؟ شتسوى علينا هااا!؟ .. وقبل الميزان ترى فيه مكان اسمه ( قنطرة ) كل من ياخذ حقه فيها حتى البهايم عزكم الله .. البهيمة اللي ماكان عندها قرون ربي سبحانه يخلق لها وتقتص من الثانية اللي أذتها بالدنيا وترد لها نفس الشي وترد تصير تراب .. وهذامعنى قول الكافر في الآية " ويقول الكافر ياليتني كنت تراباً "




وليش ماانتقص لهم هدية والا صوغة .. والله يفرحوووون وعليه .. ومرات يخشوونها بعد يتحسفون عليها .. ! والله يعورون قلبي !
ليش مانحتسب الاجر : ادخال السرور على قلب مسلم .. ولو كانت مو مسلمه ممكن نحتسب ان نحببها في ديننا .. ويمكن بهالمعالمه ربي يحببها بالاسلام وتقرا عنه زياده والا تسألنا عنه زياده وعاد يابختكم بالاجر :)))




شفيها إذا سلمنا عليهم ؟
واذا سألنا عنهم وعن اهلهم؟
واذا ابتسمنا بيووههم ؟
مو احنا بشر واهما بشر ؟

وشفيها إذا خذينا رايهم بشغله حقهم؟
وشفيها إذا شاورناهم بشي معين ؟
مو شي خاص آنه اقصد شغله عادية
مثل الاخت طمطم لما عدلت داري تقترح
علي مكان المكان يكون بالزاوية :)))
وصادف إني بحطه بالزاوية .. فاستانست يحليلها

اووو وحدها تستانس لما اقولها شلون اتسوي شغله معينه
والا عاد تعطي نصايح عن خلطاتهم هناك .. سواء حق الجسم
او الشعر او حتى الاكل .. ياسلااااام




ادري قرقت وايد وصكيت روسكم
بس جد من زماااان كاسرين خاطري
وحبيت اوصل جزء من معاناتهم مقاريد


*****

اختم كلامي

.

.

.
بنصيحة من حبيبي محمد صلى الله عليه وسلم


رأيت أبا ذر الغفاري رضي الله عنه ، وعليه حلة ، وعلى غلامه حلة ، فسألناه عن ذلك ، فقال : إني ساببت رجلا ، فشكاني إلى النبي صلى الله عليه وسلم ، فقال لي النبي صلى الله عليه وسلم : ( أعيرته بأمه ) . ثم قال : ( إن إخوانكم خولكم ، جعلهم الله تحت أيديكم ، فمن كان أخوه تحت يده ، فليطعمه مما يأكل ، وليلبسه مما يلبس ، ولا تكلفوهم ما يغلبهم ، فإن كلفتموهم ما يغلبهم فأعينوهم )
[ البخاري ]


*****

اما عاد قصة ساندريلا ..!


وحده من الحريم يحليلهم سولفت لنا عن قصة ساندريلتها ..
تقول سنة من السنين سافرت اهيا وعيالها
حالها حال خلق الله موديه خدامتها معاها
- اسبانيا -
المهم اوصلو واقعدو هناك واستانسو
تقول المره الا الاخت سندريلا انحاشت!

وينها وينها مولاقينها ..

وخلصت عطلتهم واعيزو واهما يدرون
أبد .. موراضيه تطلع لهم ..!؟
على قولتهم فص ملح وذاب

تقول ردينا الكويت .. ومرت سنين
وقررو انهم يروحون بعد
- اسبانيا -


إلا هاللي يتها بالسوق تناديها ..
ماما ماعرفتيني ، والمره ناسيتها
تقولها انا فلانه اللي كنت عندج
تزوجت شايب ومات وورثته !
واعزمتها في بيتها :)


وقامت كل ماراحت اسبانيا تزور الاخت
ساندريلا

;p



القصه صجية ترى بس سبحان الله شوفو الارزاق !
كلللللللل شي مكتووووب

إنا كل شيء خلقناه بقدر ..

سبحانك ياربي :)




.
.

تجديد

- مبروووك لشاعر المليون -
محمد بن حمد المري
من دولة قطر الشقيقة